Que vos contamos / Receitas

Novos clásicos: dúo de bolachas veganas

Que pouco se fala por aquí de repostaría… nin que nos amargasen os doces! É certo que as larpeiradas non estaban dentro dos nosos plans iniciais cando nos lanzamos a abrir a cantina, pero pouco a pouco téñense feito un oco na nosa oferta, ben a través dos produtos galegos que seleccionamos para o catálogo de venda (as galletas, bombóns e granolas de Maruxío, as marmeladas de sabugueiro de Carabuñas, as tabletas de Los Postres de Kelly ou as fantasías de chocolate Do Gaiteiro) ou ben as que creamos nós mesmas, coas nosas mans, cando nos vén a inspiración. Non é moi decotío, admitímolo, pero cando ocorre é un acontecemento.

Pois hoxe é un deses días que tiramos de fritidora de aire para elaborar as bolachas que (está feo que o digamos nós) teñen namorado o noso público vegano. Xa avisamos de que ningunha das receitas é orixinal, senón que son adaptacións ás circunstancias de cousas que temos visto pola rede, pero si podemos asegurar que son hipersinxelas de facer e que están boísimas. Sen ingredientes rarunos nin complicacións.

Sen máis, nun dous por un inédito no mercado de San Agustín, contámosvos como preparamos na Parva as nosas bolachas veganas de cacao con sal e de avea con arandos e avelás. Cotizan á alza!

Ingredientes

Para as de cacao con sal (sairán unhas 25):

    • 250 g de margarina ou manteiga vegana (tamén se poden facer con aceite de oliva. Nese caso, haberá que reducir a 130 gramos a cantidade e incorporar polo menos 50 gramos de leite vexetal á mestura)
    • 100 g de azucre (pode ser moreno ou panela)
    • Un chisco de sal
    • 40 g de cacao puro en po (nós empregamos o de Galicao, que podedes adquirir na Parva ✌️)
    • 300 g de fariña triga (tamén temos probado a mesturala con espelta, todo é ir probando)
    • ½ culleradiña de bicarbonato
    • 1 culleradiña de impulsor químico (tipo Royal)
    • Escamas de sal para decorar

Para as de avea con arandos e avelás (para unhas 10 ou 12):

  • 120 g de flocos de avea (ímolos triturar, pero tamén valería fariña de avea)
  • 65 g de fariña triga común
  • 80 g de azucre
  • 1 culleradiña de impulsor químico (tipo Royal)
  • ¼ culleradiña de sal
  • 40 g de arandos deshidratados en anacos (tamén podemos trituralos nós)
  • 40 g de avelás 
  • 60 ml de aceite (nós usamos oliva suave, pero pode ser xirasol)
  • 60 ml e 2 culleradas máis de bebida vexetal, por exemplo, de avea

Pasos

Comezamos polas bolachas de cacao:

  1. O primeiro será quentar o forno (ou a fritidora de aire, como facemos nós) a 170 graos.
  2. Nun recipiente botamos a manteiga vexetal e o azucre e batemos. Se non está moi fría a materia graxa, será máis doado.
  3. Engadimos o cacao en po, peneirándoo se vemos que é necesario e, de seguido, mesturamos a fariña, o bicarbonato e o impulsor ata formar unha masa.
  4. Unha vez estea homoxénea, collemos bólas coa man, aplastámolas sen demasiado esmero e colocámolas nunha bandexa sobre papel de forno. Antes de cociñalas, colocamos por enriba un pouco de sal en escamas (tres ou catro serán suficientes).
  5. Enfornamos 15 minutos, deixamos arrefriar outro tanto e, a continuación deixámolas nunha grella ata que estean frías de todo.

Listas para catar! Imos agora coas de avea, que tampouco teñen complicación ningunha.

  1. Coma antes, haberá que quecer o forno, neste caso ata os 190 graos.
  2. Coa nosa batedora ou robot, trituramos os flocos de avea ata que quede unha fariña grosa. Facemos o mesmo coas avelás (non pasarse, aquí queremos anacos, non froitos secos en po) e os arandos, se non veñen xa en anacos (neste caso, a operación non é tan doada, unicamente se partirán un pouco, pero non hai que preocuparse, valerá como queden, mesmo enteiros sen non queda outro remedio)
  3. Nun bol incorporamos a fariña de avea, a de trigo, o azucre, o sal, o impulsor, as avelás e os arandos e misturamos cunha culler.
  4. Unha vez que temos os ingredientes secos, engadimos os húmidos: o aceite e o leite vexetal. Mesturamos ben ata que quede unha masa manexable coas mans. Se queda excesivamente densa, agregamos un pouco más de leite vexetal, de cullerada en cullerada.
  5. Cunha culler grande (vale unha de xeados, pero non é necesaria) ou coas mans facemos porcións parecidas a bólas do tamaño que máis nos guste (40 gramos por bolacha pode ser unha boa opción)
  6. Colocamos as bolachas nunha bandexa de forno forrada con papel sulfurizado e aplastamos un pouco coa man. Non teñen que quedar moi finas, a aparencia final será similar á dunhas cookies.
  7. Enfornamos durante 20 e comprobamos que empezan a dourarse por embaixo e que a parte superior non estea húmida (en caso contrario, deixamos 3 ou 4 minutos máis)
  8. Retiramos e deixamos arrefriar na propia bandexa.

Xa vedes, nin técnica, nin tempo nin ingredientes demasiado difíciles de atopar. En calquera caso, os arandos e as avelás poden substituírse por noces e anaquiños de chocolate, pasas ou o que teñamos pola lacena.

A merendar!